உடல் ஆரோக்கியம் மனித வாழ்க்கையின் மிக முக்கியமான அம்சம். ஆரோக்கியமான உடல் இருந்தால் மட்டுமே நாம் அனைத்துப் பணிகளையும் சுறுசுறுப்பாகச் செய்ய முடியும். உடல் நலம் இல்லையென்றால் பணம், புகழ் எதுவும் பயனற்றது. இஸ்லாம் உடல் ஆரோக்கியத்திற்கு முக்கியத்துவம் அளிக்கிறது.
உடல் வலிமையைப் பேணுவது முஸ்லிம்களுக்கு வலியுறுத்தப்பட்டுள்ளது. நபி(ஸல்) அவர்கள் கூறினார்கள்: ‘வலிமையான முஃமின் (நம்பிக்கையாளர்) அல்லாஹ்வுக்கு மிகவும் விருப்பமானவன்’ (முஸ்லிம்)
இந்த நபிமொழி உடல், மன வலிமையை வளர்ப்பதை வலியுறுத்துகிறது. நபி(ஸல்) அவர்கள் தமது தோழர்களுடன் ஓட்டம், குதிரை ஓட்டம், நீந்துதல் போன்ற பயிற்சிகளில் ஈடுபட்டுள்ளார்கள். இவை உடல் திறனை வளர்ப்பதற்கான நபியின் வழிமுறைகள் ஆகும். எனவே, நம் அன்றாட வாழ்வில் சில எளிய வழிகளைப் பின்பற்றி ஆரோக்கியத்தைப் பேணிக்கொள்ளலாம்.
பழங்கள், காய்கறிகள், தானியங்கள், புரதம், பால் பொருட்கள் ஆகியவற்றைச் சீராக உண்ண வேண்டும். துரித உணவு, குளிர்பானங்கள், அதிக எண்ணெய் உணவுகளைத் தவிர்க்க வேண்டும். தினமும் குறைந்தது
30 நிமிடங்கள் உடற்பயிற்சி அல்லது நடைப்பயிற்சி செய்ய வேண்டும். மெதுவான ஓட்டம் அல்லது சைக்கிள் ஓட்டம் போன்றவை உடலுக்கு நல்லது. ஒரு நாளைக்கு 6 முதல் 8 மணி நேரம் உறங்குவது அவசியம். தூக்கம் சரியாக இல்லாவிட்டால் உடல் சோர்வடையும், மன அழுத்தம் ஏற்படும். ஒரு நாளைக்கு குறைந்தது 2 முதல் 3 லிட்டர் தண்ணீர் குடிக்க வேண்டும். இது உடலில் உள்ள நச்சுகளை வெளியேற்ற உதவுகிறது.
மன அழுத்தம் உடல் நலத்தைப் பாதிக்கும். எனவே தொழுகை, திக்ர் ஓதுவது, குர்ஆன் ஓதுதல், ஹதீஸ் புத்தகங்களைப் படிப்பது போன்ற செயல்கள் மூலம் மனதை நிம்மதியாக வைத்துக்கொள்ள வேண்டும்.
ஆரோக்கியமே முதல் செல்வம் என்பதை நினைவில் வைத்து, ஒவ்வொரு நாளும் நம் உடலைப் பராமரிப்போம்! இஸ்லாம் ஒரு சீரான வாழ்க்கை முறையை ஊக்குவிக்கிறது. உடற்பயிற்சி, சரியான உணவு, ஆரோக்கியமான வழிகளைப் பின்பற்றுவது இஸ்லாமியக் கோட்பாடுகளில் அடங்கும்.
